რაიდმედის საცხენოსნო სკოლა ლისის ტბის მიმდებარედ, რაიდ-რანჩოს ბაზაზე ფუნქციონირებს ცხენსა და ადამიანს შორის ურთიერთობა მრავალსაუკუნოვანია. ჰიპოკრატე გახლდათ პირველი, ვინც იმის მტკიცება დაიწყო, ცხენზე ჯდომა დაჭრილებსა და ავადმყოფები უფრო სწრაფად აჯანსაღებსო. მერე მელანქოლიკებს შეუჩნდა – რაშზე ამხედრდით და გახალისდებითო. დაკვირვებული კაცი იყო – შეამჩნია, რომ ჯირითი ადამიანს შავბნელი აზრებისგან ათავისუფლებდა და ნათელ ფიქრებს ჰგვრიდა.

 სამწუხაროდ, დღევანდელ მსოფლიოში ბავშვები და მოზარდები გაუცხოებულნი არიან ბუნებისგან, სწორედ ამიტომ საცხენოსნო სკოლას გარდა ფიზიკური აქტივობისა, დიდი სოციალურ-აღმზრდელობითი მნიშვნელობაც ენიჭება. პატარებს საშუალება აქვთ არა მხოლოდ გაიცნონ თავისი მეგობარი ცხენი, არამედ შეეჩვიონ ცხენოსნურ გარემოს, თავლას, ცხენის სადგომს, ცხენის მოვლასა და კვებას. რაც ცხენისა და ბავშვის დაახლოებას უწყობს ხელს.